M3 Italian (已結業)

今日黎沙田探朋友，同朋友嚟咗M3食意大利菜。一早訂定位，如果唔係一定食唔到。餐廳都幾大，但好快已經坐滿。點完嘢食好快就有溫暖嘅包送到，加啲黑醋加啲橄欖油，特別好味。香辣蒜蓉大蝦蒜蓉味好濃，大蝦肉質爽口，有少少辣椒，但唔係好辣，怕辣嘅朋友都食得，加啲沙律菜可以中和濃味。總共有六隻大蝦。凱撒沙律傳統嘅凱撒沙律，多士大大粒，好脆口，沙律菜切到細細塊容易入口，沙律醬酸味亦剛剛好，包住每一塊沙律菜，沙律菜好新鮮。中間有一隻溫泉蛋，撈埋黎食最好味。四色芝士薄餅芝士味好濃，有啲鹹但接受到，最欣賞個薄餅嘅餅底非常之薄，薄多好似餅乾，拎起手好易碎，好耐冇食過咁薄咁脆嘅Pizza。最後係海鮮意大利飯賣相非常吸引，連隔離枱都話靚，意大利飯最鍾意就係生生地嘅感覺，帶子好大粒，有蝦有青口有魷魚。味道不錯，啲汁唔算好多，夠飽肚。店員非常細心，雖然我哋坐最入個張枱，但店員都不停為我地碗碟加水，非常細心。