鮨丼 (已結業)

以前我一直都唔食刺身的，不過同老公上次去完日本旅行之後就開始愛上，以前朋友約食日本菜都好少預我，知我開始食刺身之後就約多左好多。今日我地去食呢間尖沙咀鮨丼開張冇耐，朋友試過話唔錯，今日約埋我一齊去食。餐廳都幾多人，裝修富有日式風格，丼飯選揀超多，每客丼飯都送前菜、沙律同味噌湯，味噌湯有蜆肉同菇，好足料。四色吞拿魚刺身丼 278吞拿魚丼性價比都幾高，醬油漬吞拿魚刺身同吞拿魚赤身都好鮮甜，大拖羅富有油香，入口軟腍，魚鮮味香濃。鮨丼自信作雙層丼 328雙層丼份量超多，一層係鮑魚同刺身，刺身有赤貝、北寄貝同生蠔，我食左赤貝同北寄貝，口感爽脆彈牙，非常美味。另一層係極上大拖羅雜錦刺身飯，大拖羅粒同其他刺身粒非常有光澤，大拖羅加上三文魚腩、油甘魚同魚子等每款都好鮮甜嘅刺身，配日本壽司飯，味道層次豐富。鮨丼嘅丼飯份量實在太多，下次叫多個姊妹，三個人食兩客都應該夠食。