星廚 (已結業)

我以前住長沙灣青山道附近，聽聞有間豬手好食，叫星廚。點知開左無幾耐又執左，以為佢做唔住，係前排先知原來搬左去太子。係佢長沙灣店年代已經愛上佢既鹹豬手，以為無機會再試，一知道原來佢係太子東山再起，即刻約朋友去食！首先黎到既係法包，摸上手仲係熱既，牛油係麵包上慢慢溶化，算係西餐既基本前菜，合格！蘑菇湯好濃郁，好多切碎左細細粒既蘑菇碎係湯入面，啱曬鍾意有啲咬口既我。鹹豬手果然無令我失望，一樣咁大件兼咁好食！佢既鹹豬手好香，外皮好脆，神奇既係入面啲肉唔會好乾，啲肉質好林，好入味！不枉我特登黎食！係香港食呢個份量既鹹豬手最少都要$200-$300，呢度大大隻都只係百幾蚊，好抵食。鹹豬手轉套餐有薯菜，好少食到會推薦既薯格，真係要趁熱食！另外叫左芝士蘑菇意粉，蘑菇好大隻，上面加左好多配料，好juicy，但係食完蘑菇淨返啲意粉就有啲dry。最後，我地2個人真係食唔曬隻鹹豬手，唯有打包，仲可以攞舊骨返屋企煲湯添。