鳴越越式料理

營業中

休息中

記得個晚上完堂已經差唔多九點，超級肚餓，但上環閒日夜晚好靜，完全唔知有咩食，即刻上openrice 搵餐廳，見到呢間係附近又未收，就即刻走去醫肚。餐廳裝修走懷舊風，感覺好吸引遊客，餐牌選擇好多，有配飲品嘅套餐亦有單點食物。我好耐無食過越式撈檬，見到餐廳有提供就點左豬頸肉撈檬，可能太夜嘅關係，侍應話已經無檬粉，問我轉唔轉金邊粉或者幼麵，我揀左金邊粉。餐廳上菜速度好快，豬頸肉撈金邊粉好大碗，而且豬頸肉亦比我想像中多，有超過十塊，首先試下豬頸肉，肉嘅厚度切得啱啱好，仲幾入味，又有咬口，比我想像中整得出色。再試埋金邊粉，爽口彈牙，加埋汁撈，汁嘅味香又唔會太濃，唔會搶去豬頸肉嘅風頭，整體配合唔錯。唯一就係金邊粉比檬粉粗，個人覺得撈檬口感會更好。最後值得一提係餐廳唔洗加一，五十幾蚊有如此質素同份量，性格比算高，下次有機會會再黎試其他野食。