中環茶記 (已結業)

今日夜晚嚟到中環，見到呢間餐廳價錢比較經濟，裝修又幾得意，於是入嚟試吓。餐牌就係茶餐廳+大排檔嘅嘢食，有三文治、小炒，仲有類似打冷嘅滷味。叫咗一碟椒鹽鮮魷，出乎意料好食，粉漿好薄，唔會食到成口粉，椒鹽好惹味，亦冇一般大排檔咁鹹，比較健康。另外叫咗一碟上湯浸時蔬，揀咗白菜，味道正常。見店內大力宣傳鹹蛋流心西多士，所以叫咗一份做甜品。有少少失望就係個鹹蛋完全唔流心，好彩味道好濃郁，同西多意外地夾，做飯後甜品非常適合。飲品叫咗杯凍奶茶少甜，飲到最後難免比較淡，建議餐廳可以試吓整冰鎮奶茶。另外要特別讚侍應非常有港式人情味，我多嘢拎佢就主動俾張凳我放袋，又會建議我哋將西多留返最尾先落單當甜品食，上完菜又會問吓我哋覺得好唔好食，令成餐飯嘅滿意度提升唔少。