鄰居 (已結業)

12:30開門，準時去到已經有人等緊。餐廳有6張枱仔，無一陣就已經爆左，要排隊了。星期一至五佢地有個$50 lunch set，包一個美式牛肉漢堡、薯條同一罐飲品。漢堡包包皮軟熟，用牛油微微烘過，甜味，單食個包已經好好食。而塊牛肉厚度適中，見佢都煎得幾燶下。不過單食都幾咸，算叫有肉味，但乾身，完全稱唔上juicy。不過食漢堡包就梗係夾埋啲餡料一齊食㗎啦。個包甜甜地，舊牛就咸咸地，加埋其他配料，整體來講平衡得幾好。而跟餐薯條係厚切嘅粗薯條，面頭灑上少少香草，唔怕太鹹，幾好食。呢個漢堡包餐都算幾大份，對女仔來講真係好飽。成個餐整體來講性價比高，絕對係回頭之選。