匠心味舍

營業中

休息中

午餐 • 2人第一次俾負評偶爾會試吓新開嘅餐廳，都好少會中伏，今次真係中咗好大嘅伏! 岩岩入餐廳嘅時候企咗幾分鐘但無人理會 (探熱果d當然無)，個個人都好忙做自己野，後來要我哋自己問個樓面係入去坐定點，佢就叫我哋問出面個receptionist。Receptionist 話有位就坐啦，ok，揾完位坐低等緊野食果時，我哋突然被receptionist 要求搭檯。本身搭檯唔係問題，但應該要喺我哋坐低前講聲先，唔係坐坐下突然話要搭檯。4人枱，我哋坐2個位再加兩個陌生人，喺疫情期間係咪點都應該事先通知聲？食物方面，飯不過不失，意粉等咗40分鐘先有，野飲只有茶餐廳嘅選擇。火炙牛柳蓋丼 ($65)味道一般，醬汁還可以，但牛柳份量較少。卡邦尼意粉 （$70)基本上係黑椒卡邦尼意粉，因為黑椒係·超·級·多，多到每一啖都係食緊十幾廿粒黑椒。本身我唔討厭黑椒，但多到好辣，而且成個意粉淨係得黑椒嘅味，加上好油膩，真係好難食。餐廳嘅食物價錢貼近cafe，但環境好嘈、等候時間又耐、食物味道差，服務態度麻麻 (得個男仔服務態度好），所以呢個價錢真係好唔值。總括黎講，唔推薦，我哋以後都唔會再黎。