新牛屋餐廳 (已結業)

今日同男朋友去佐敦食lunch。想試新食肆, 想起上次食咖哩王時隔壁的牛屋幾吸引, 於是特地一試。門口絕對望唔到裡面係點樣的, 入到去至知裡面迫到嘔, 塵位間格密麻麻, 一大陣味焗住o係入面, 麻麻地。落單的男侍應是新來的, 慢得交關之餘不熟悉餐牌, 落一張單要我重覆幾十次, 其他檯的女仕都有此等情況, 哈, 可能女仕比較無耐性啦。叫左個蒜蓉牛扒拼薯菜同香橙豬扒配飯(男侍應仲問我個蒜蓉牛扒係咪要黑椒汁喎, 我跟住個餐牌叫架咋喎), 兩個餐的汁都一味死鹹, 味道可謂無厘特色。豬扒是一塊充滿雪味的有骨肉, 還帶著陣陣加工味, 飯更加少得可憐, 反而鹹得要死的汁就多多都有。牛扒中心還生的, 坦白講, 對quality低的牛肉, 不太喜歡吃生的。味道方面相信都唔使問啦。唯一優點是薯條份量都幾多, 薯條亦無不好吃的道理。檯頭枝茄汁得一成滿, 倒唔出的, 叫男侍應換過, 換來一枝兩成滿的。枝茄汁拎上手仲痴立立, 哈哈!快快吃完快快閃人為上著。