Plaza Cafe (已結業)

團購下午茶，原價$2××，團購價$118 for two. 搵路都幾麻煩，因為郵輪碼頭太大。但交通都算方便。餐廳環境都ok, 有大片玻璃望到出面公園。今日唔係好多人黎食，可以靜靜地放鬆下團購嘅下午茶可以揀兩杯飲品，個餐有三件唔同味嘅三文治、炸魚薯條、幾件迷你鬆餅、焦糖布丁、tiramisu、朱古力蛋糕同雜莓撻。三件三文治都好好食。碎蛋治上面嘅好似係風乾火腿，甜甜地脆脆地，好好食。黑松露雜菌治嘅雜菌都好多，口感豐富。香草三文魚就最啱我口味炸魚薯條都好香脆，就算我擺耐咗都好好食，有沙律醬同茄汁可以點。幾件鬆餅，兩件芝士味、兩件有少少薑味，仲有一件我覺得最好食，但唔知咩味有，有紅莓喺上面。可以搽草莓醬（有草莓粒）或牛油忌廉。雖然個人覺得草莓醬同鬆餅襯啲，但不得不讚個牛油忌廉真係好香口！Tiramisu食到底層個蛋糕濕濕地，有咖啡滲出黎，幾得意。雜莓撻toppings豐富，個底都好厚，好香牛油味！服務態度、環境同食物質素都好好，唯一扣分嘅係我坐果個位有幾隻小飛蟲不停喺我附近飛。其實店面同餐具睇落都好乾淨，唔明點解會有小昆蟲。如果冇咗啲昆蟲，呢間餐廳真係幾吸引。