威尼斯餐廳

營業中

休息中

星期日總會想試下西餐，不過由於夜晚已經有著落，所以就去咗呢間小店試下西餐。原來呢間餐廳夜晚先有扒食。中午就比較燴飯同意粉，如果講fusion 菜，就係胡麻沙律伴鰻魚飯啦。先講講個香草蜆肉忌廉湯。 就咁聽個名就已經知佢有咩材料。碗湯都算足料，食到啲蜆肉，忌廉味都夠濃，成碗湯愈飲愈覺得香濃。最緊要係飲完碗湯，食完餐飯都無話特別口渴。值得一讚。龍蝦汁煙三文魚闊麵都算對板。啲煙三文魚都幾新鮮。闊麵沾上濃滑既龍蝦汁，的確幾惹味。最緊要評埋個胡麻沙律伴鰻魚飯。胡麻沙律好食。沙律菜好新鮮，沙律醬份量恰好，不會過多。成餐飯比較出事就係個鰻魚飯。先講個飯，濕過頭，仲有水汽；啲飯唔係珍珠米，一加埋啲鰻魚汁，有少少爛。鰻魚都幾多骨，切得比較薄、窄身。 不過講埋句公價說話，呢個價錢食到鰻魚飯加埋沙律，其實都合乎情理吧。最後讚返一樣野，凍檸茶叫咗少甜少冰，出品的確係少甜少冰，證明水吧有心，唔係hea做既！