Studio City Bar & Cafe (已結業)

第一年同阿亨過情人節。我地一早Plan左睇場戲先食晚飯。我地先去MegaBox睇七點半，再去戲院隔離o既Studio City嘆情人節晚餐。阿亨一早訂左位，所以我地好快就被安排入座。未入餐廳，係門口已經見到又簡單又靚o既佈置，玻璃窗貼左好多大大小小o既紅色心心；餐廳入面播住英文歌，感覺都幾好。當晚o既情人節晚餐都幾豐富，有頭盤、湯、兩個主菜、甜品同餐飲，埋單大約600鬆d。頭盤係煙三文魚caesar沙律同Parma Ham哈蜜瓜。沙律菜好新鮮，caesar醬開胃；個Parma Ham 好好食，夾埋哈蜜瓜一齊食，正！湯係蟹肉南瓜湯，仲有蒜蓉包。湯夠熱，味又夠濃！主菜分別係安格斯牛扒、虎蝦蕃茄天使麵。阿亨讚牛扒有肉味，叫七成，燒得岩岩好。 d蝦都幾大隻，唔"梅"，意粉煮得唔錯，個蕃茄汁好惹味。甜品就最令我開心，因為有齊雪糕、Tiramisu同Brownie，岩哂我胃口。雪糕上面插左兩塊用朱古力整o既心，阿亨讓哂比我食！基本上，我好滿意呢個晚餐。 o野食好味，餐廳o既Waiter服務都好好。下次再黎，試埋其他o野先。