M1 Bar & Restaurant (已結業)

難得早收工，約左同事去Happy Hour，見M1 Bar & Restaurant 環境幾摩登同舒服就試下。叫左香蒜辣椒欖油煎虎蝦做小食，薄到有如紙一樣既香蒜炸到脆卜卜，經過欖油煎過既蝦，吸左欖油同香蒜既香，辣椒仔既辣，蝦又大隻，蝦肉又爽同彈牙。我自己將蝦肉連同蒜片放係法包上面一齊食，香脆法包吸左欖油更加香，有如小漢堡。吹完水見肚餓，索性食埋晚餐。西班牙黑毛豬比薩，濃郁芝士味撲鼻而來，新鮮火箭菜平衡左肥膩既感覺，黑毛豬果然正，肉富有彈性，而且好香又唔太咸，做到外脆內鬆又唔滯。最後個美國安格斯牛肉芝士漢堡配薯條，牛肉大到有如牛扒，而且肉汁多到一路食一路滴，好juicy，值得一讚係個包，用左日本竹炭，相對比較鬆化，加上烘到少少脆，係外脆內軟，承接晒牛肉滴出來啲汁，唔會浪費。間餐廳仲好貼體，食物慢慢送上來，方便大家吹水。