隨心華人喇沙海南雞

營業中

休息中

收工同朋友嚟咗係鰂魚涌地鐵站附近嘅隨心華人，位置好就腳。餐廳名入面有曬我地想食嘅喇沙同海南雞，問店員仲有無咩菜式推介我地，佢推薦火山排骨，呢道菜我係曼谷Jodd Fairs食過一次，決定係香港再試下~ 火山排骨: 上菜嘅時候職員會點火，火焰嘅效果令我地wow一聲，打卡一流! 份量都好大，舊舊排骨比我拳頭仲大。最有驚喜嘅係肉質，炆到好淋，一啲都唔韌，淋上香料，湯底微酸，味道唔辣，適合香港人口味。呢到嘅火山排骨比我係泰國夜市食嘅好食好多，我記得泰國夜市嘅排骨好韌，一味得個辣字，呢到就處理得好好多海南雞喇沙: 喇沙湯底好香，店員仲好好咁過嚟介紹話係老闆親自打磨南薑等等嘅香料，食得出啖啖心機。海南雞滑嫩新鮮，配嘅薑蓉打得夠碎得嚟又有薑絲，正。要特別讚下店員態度真係好友善，見我地食火山骨就主動問我地需唔需要檸檬水洗手同比紙巾同骨碟，非常貼心呀