潮食地 (已結業)

朋友帶我行香工，第一次去，一逛已經一個下午，臨走行過潮食地，佢係一間靚版茶記，見佢啲小炒都幾吸引，就外賣返去試下。店面好大，地方都好乾淨企理，落單後唔洗等好耐就可以拎外賣。椒鹽脆鮮魷($98) - 所有小菜本身都跟左白飯、中湯同熱飲，可以另外加錢轉凍飲或其他特飲。中湯入味得黎唔會好味精，飲完都唔會口渴。鮮魷外賣返到黎雖然有少少腍左，不過椒鹽好夠，非常惹味，炸漿亦唔會太厚，蘸埋個醋汁食，酸酸地唔會好油咁。泰式香茅咖哩雞($88) - 咖哩雞一樣有跟白飯中湯同熱飲，咖哩唔會太杰亦唔會水汪汪，雖然唔辣但都好惹味，餸飯一流，入面有好多件雞，另外仲有青紅椒同蘿白，都幾足料。奶茶紅豆冰 & 荔枝梳打(跟餐加$10) - 奶茶紅豆冰入面有超多紅豆，粒粒紅豆都煲到好腍，奶茶味亦夠香，正！荔枝梳打本身杯入面只有荔枝糖漿，荔枝味香甜，梳打係罐裝要自己加落去，所以建議每飲少少就要加梳打水入去，同埋要攪勻，否則最後只得返梳打味。總結，野食唔差，外賣乾淨靚仔，定價雖然講唔上係平，不過亦交足功課。