見見面 (琉璃街) (已結業)

天后區畢嬲都多小店好野食，行行下就聞到浸辣味，因為身邊個個都唔食辣，難得今日友人嗜辣，就試下間川菜。呢間野叫見見面，我地就叫左個酸菜烤青江魚小辣，你知辣呢家野間間份量都唔同嫁啦，都係保險啲好。條青江魚一上黎，除左好大條之外重好厚肉，三個人食其實都夠食。佢條魚起左骨之外，成條都炸到金黃色先放係個爐上邊，相當有誠意。酸菜份量係適中既，唔會令到成盤烤魚過酸。配料佢都比到好足，有豆皮、蘿白、冬菇、芹菜咁。我地另外就加埋寬粉同窩荀。窩荀碌到淋吸左啲酸菜味基本上係無得輸。我地另外重叫左個黃喉，牛黃喉係香港就比較小見。黃喉既質感好特別，淋得黎又爽口，如果有機會真係要試下，佢比豬黃喉更加有層次。辣度方面小辣就好似譚仔5小辣既辣度咁。想去試下既朋友可以搵呢個做參考。