牛魔 (已結業)

牛魔係一間日韓烤肉店，烤肉雖然好味，但最怕就係食到成身成頭都係煙味，好多烤肉店雖然爐上面有抽油煙機，但食完都仲係會有陣味，不過牛魔特別設置嘅燒烤枱有地下抽氣，食完真係完全冇煙味，所以今次已經係我第二次幫趁。牛魔嘅燒烤枱上面冇抽氣裝置，但一樣唔會食到成身煙味。前菜三小碟有中華沙律、芽菜同辣青瓜，大大碟食完仲有免費追加，清清涼涼幾開胃。乳酸梳打特飲($48)乳酸梳打幾重乳酸味，但一定要攪勻佢，否則會淨係飲倒梳打味，飲到後尾又會太甜。美國Prime醬油牛肋骨($198)牛肋骨一份有兩大塊，好腍冇筋。牛肋骨本身用醬油醃左，已經好入味，就咁食已經好好食。鍾意重口味嘅，亦可以試下蘸少少玫瑰鹽食。辣豆腐海鮮湯($98)海鮮湯有配白飯，裡面有大蝦、蜆、魷魚、金菇同豆腐，非常足料。海鮮湯熱辣辣，辣度啱啱好，唔係得死辣，我鍾意跟傳統食法將白飯加入湯內當泡飯食。總結，烤肉好食又唔會食到成陣煙味，除左烤肉，其他食物亦有水準，前菜仲有得免費追加，唔怪得哩個時勢都仲幾多人幫趁。