名人私房菜 (已搬遷) 新店位置

同事話一齊黎食私房菜，當然好啦，一大班人可以食好多味餸架喎。諗起都流口水。地點好近地鐵站，老細安排左一間房間俾我地，增加私隱度。頭盤係花鵰蟹蒸水蛋，水蛋口感相當滑，滑到直入喉嚨。花鵰味香而清，與蟹味夾，增強水蛋味道，清甜而帶點酒精味道。至於花蟹相當大隻，花鵰味滲入蟹肉，令鮮甜味更出。第二道係糯米雞，初頭我睇唔明，只係見到隻雞，原來一切開裡面就全部係糯米。糯米飯相當香，荷葉香加上雞肉味，令味道香上加香。雞肉滑嫩而且帶點荷葉香，夠清新。呢道菜食起上黎仲帶有驚喜添。蒜蓉蒸貴妃蚌，聞上黎都夠香，食落就更香，貴妃蚌蒸到剛剛熟，口感超滑，仲有海水清甜味，少量既蒜蓉成功襯托蚌既鮮甜味道，口感比扇貝更滑。最後有黑椒炒大蝦，炒到相當入味，黑椒味香濃，比避風塘炒法更新鮮，大蝦新鮮，黑椒味滲晒入蝦肉，令味道帶點辣，更惹味，佐酒一流。