蝦棧 (已搬遷) 新店位置

曾經睇雜誌介紹過呢間餐廳，趁着近日天氣轉涼，就想去食下蝦煲。一入到餐廳，就有一缸新鮮海蝦，坐低左之後聽老闆介紹啲蝦係即叫即捉。我哋叫咗兩個蝦煲，一個奶油蝦，一個鹹蛋黃蝦。奶油蝦煲一上就香氣撲鼻，奶油味極重，有啲似cabonara嘅味道，啲大頭蝦啖啖肉，又入味，連墊底嘅洋蔥都充滿着奶油味。個鹹蛋黃蝦老闆話係香港口味，啲鹹蛋黃茸痴晒係蝦殼上面，食嘅時候可以食到每一啖都有鹹蛋味，非常惹味。我哋仲有叫咗個台式香腸，特別嘅係佢有一種香係墨汁腸，有豬肉乾嘅味道，配上蒜頭食一流。再嚟就係臭豆腐，佢嘅臭豆腐冇我地想像中咁臭，但係食落口都係一樣惹味，加上鴨血，係非常之台式嘅小食。佢最令到我哋意想唔到嘅就係個番薯雪糕，舊番薯雪糕番薯味超級濃，好似真係食緊舊蕃薯咁！