Le Mieux Bistro (已結業)

今日同阿妹食咗一餐好愉快嘅Lunch.此店嘅Set Lunch分$140同$280兩種,我同妹妹決定兩種都試哂,由餐包到餐飲都令人滿意.詳細介紹如下:此店嘅餐包夠特式同鬆軟,配埋酸忌廉芝士醬嚟食好好味.前菜嘅鴨肝沙律味道好,鴨肝質感軟滑,入口溶化,好正.吞拿魚雖然咸咗啲,但魚肉同沙律菜都好新鮮.餐湯有蘑菇湯同洋葱湯,本人勁鍾意蘑菇湯,事關此店整得好creamy,好濃郁,好香菇菇味.至於洋葱湯就一般啦!!講到主菜有牛肉同三文魚,牛肉煮得嫩滑,有牛味,唔會嚡實實乾僧僧,味道啱啱好.三文魚雖然整得唔嚡,但伴碟嘅薯蓉同佢超咸,味道嘛嘛.甜品方面,朱古力心太軟好正,睇得出係用靚嘅朱古力來做,唔會一味得個甜字,味道啱啱好.至於用香草八角嚟做嘅雪糕,雖然夠哂特別,但唔係人人接受,好唔好食就見仁見智,不過我同阿妹就唔係太鍾意,又苦又甜,感覺好怪.最後嘅餐飲叫了咖啡同檸水,檸水冇乜特別,咖啡就好好味,又香又濃,用心製作,一啲都唔馬虎.總括來講,此店食物味道好,環境舒服,侍應又有禮貌,令人滿意,加上午餐又唔算貴,值得再次幫襯.