Itamama (健威坊)

營業中

休息中

今日本來諗住去北角食潮州菜， 點知滿座兼要等好耐，嬲得滯去搵第間， 見到有間 itamama喺港運城， 膽粗粗入去試下， 結果有意外收穫 ，啲嘢食都唔錯，地方闊落，坐得舒服。 我食咗個三文魚椰菜花高纖飯 ，honey就食咗個黑椒牛柳粒珍珠飯 ，仲有一碗蘑菇湯送。 珍珠飯旁邊仲有啲好靚嘅生菜，淋咗啲日式芝麻沙律汁，見到都好開胃。 我個三文魚高纖飯仲正，煎香嘅三文魚好鮮味，個飯入面有椰菜花， 雜菌，翠玉瓜，青瓜，洋蔥，仲有紅腰豆，真係健康又好食。仲有一樣最實際嘅就係價錢平，兩個人都係食咗166蚊 ，食得舒服又健康，下次再嚟幫襯。 仲有每日都有特價嘅餐， 如果有啱嘅仲平啲，見到隔離啲人又食蝦又食牛扒，好似好多選擇咁，今日發現新大陸 ，下次要試下第二啲嘢先。