羲和小館 (已結業)

周末入東涌走走，因為聖誕食咗幾日西餐，今日想食中餐。經過羲和小館，睇完餐牌覺得嚟唔錯，就決定試下。職員安排入座後，落完單好快就有嘢食。點咗半隻烤鴨配八寶盒，有四種食法，幾特別，配搭出嚟嘅口味亦唔錯。 最特別係用咗一個發熱嘅裝置暖住啲鴨肉，唔會搞到凍冰冰。另外點咗個金銀蛋萵苣亦幾好味，唔會太咸，啱啱好。最後甜品係薑汁桃膠，有薑味得嚟唔會太辣，又唔會係勁甜嘅糖水，幾好食。整體嚟講，環境幾好，坐得好舒適，服務好好，下次再試下其他菜式。