百好素食 (已結業)

今日去到黃大仙，正值午膳時間，所有食肆到好爆，見到百好素食比較鬆動，雖然感覺貴價些，但想食得舒服，好歹都係一餐，就入去試吓…因大枱較多，服務員見我一個人，就帶我坐响角落一張兩人枱，我隨意點咗個52蚊一個飯，諗住quick lunch，簡簡單單……跟住有一位太太進店，也是一個人，服務員就問我介唔介意一齊坐，我諗自己都係坐一張櫈，無所謂。我個飯嚟咗，嘩！好大個蒸籠，大過我塊面，點食得晒?我冇諗過五十幾蚊個飯會咁大個，我點都食唔晒，為咗唔浪費，我邀請對面那位太太一齊分享，她正在考慮點菜，諗咗陣，就話不如對半分，一齊計數，我哋問服務員可否合併，佢好樂意話咪當我哋一早相識一齊食飯，有咩唔得? 跟住就幫我哋整過張單...個飯用荷葉墊住蒸，香噴噴、熱辣辣，由於主菜係東菇豆腐，味道始終比較清淡，食慣濃味的香港人可能唔慣，不過食齋都係為健康啫，而且芡汁都幾好味，份量兩人分都可以，值得推薦。那位太太也是第一次幫襯，佢之前食過百好的外賣齋點覺得好食，所以今日過開嚟就試吓，我哋點個蒝荽餅，因為佛誕前後至有得食，有三件，店員預先幫我哋將其中一件cut開兩半，方便我哋分嚟食，好周到！我第一次食蒝荽餅，覺得皮薄饀靚