香港仔周記點心茶餐廳 (已結業)

今日九龍人難得過海口喝玩樂，突然想食下一盅兩件，又唔想去傳統酒樓食點心，咁都俾我揾到呢間驚喜新派點心餐廳。門面設計別出心裁，坐位空間都夠不算迫。餐單選擇都幾多，當然我地都二話不說就點晒所有招牌點心喇我地兩個人總共點左七個點心：黑白芝麻蝦多士、和風海鮮腸粉、周記蝦餃皇、老干媽醬炒銀針粉、鮮蝦腐皮卷、鮮蝦菜苗餃、上湯魚肚雲吞。蝦餃爽腍交錯，皮夠煙靭，蝦肉爽脆。菜苗餃亦都係非常煙靭，美中不足係個菜苗係白菜唔係豆苗。竹笙魚肚雲吞非常清新，魚肚亦都好有鮮味，個上湯好好飲，魚肚雲吞呢個配搭好有創意。銀針粉帶少少辣，好有油香同事亦都唔肥膩。蝦多士直頭係一流，蝦肉非常之肥美， 只係$40就有四大塊，好抵食。和風海鮮腸粉亦都係非常突出，腸粉入邊有日式醬汁同埋鰹魚絲，撞埋傳統嘅腸粉口感豐富。鮮蝦腐皮卷即叫即整香脆熱辣，不過食完先發覺原來我地樣樣都有蝦。最後買單只係$300 ，哈哈，我地都差少少食唔晒，真係大滿足。的確是幾好味又有特色，值得一提就係老闆伙記們都服務態度一流，好有禮貌又好好人。如果下次再經過上環，一定會返嚟再食。