一品香南北美食

營業中

休息中

今日抽起條筋想食雲吞咁啱又經過一品香，點知留下不生難忘的味覺衝擊。叫咗一碗菜肉雲吞配鍋貼豆漿。鍋貼賣相可接受，但落單後唔夠5秒後上檯已經心知不妙。第一口咬落去既感覺好似咬緊舊乾咗既凍麵團，裡面冇肉汁不在話下，第一次食鍋貼既皮係厚到好似隔咗夜既硬身菜肉包咁。由於鍋貼既餡充滿味精所以搞到好口渴，一飲杯豆漿不得了。竟然係一杯冇味好似溝咗水既豆漿。威士忌溝水就飲得多，豆漿溝水真係第一次。到雲吞上檯，賣相都ok既，點知筷子一夾就知瀨嘢。包雲吞個師傅包個刻應該充滿住激動既心情。D雲吞實到好似乒乓肉丸咁，而裡面d餡都係同鍋貼一樣，經過滿滿的味精洗禮。食咗一粒半已經頂唔順。整體上今餐最好味係湯裡面D菜。不過由於個湯都係有嚴重既味精所以食完都係好口渴。而家口渴到好似係撒哈拉沙漠行咗兩日兩夜冇飲過水咁要搵水源。隔離檯兩位羅致光口中所講既中年人士，食完自己個餐聽到佢地竟然話好味然後再追加鍋貼同雲吞。。。一品香做咁重口味既食物可能係用心良苦，等味覺退化既老友記可以品嚐到久違既味道。對於味覺健全既人士，一品香，可一不可再。