魚一丁刺身居酒屋 (已結業)

今晚女友去銅鑼灣做yoga，自己打完波之後就去接佢，順便揾食。查實我係好怕响銅鑼灣揾食--- 又要唔好咁貴(因只係平日，唔想食太貴)，又要好食，真係考起人。唔想去Times Square food court，見好耐無去過呢間嘢，決定返去試吓。星期五，實要等陣位，等咗三張檯就OK...打開MENU，見到換咗唔少菜，自己淨係想試番佢哋最拿手嘅一丁拉麵沙律，其他俾女友揸主意。叫咗蕃茄芝士豆腐扒、精選箱押壽司及煙肉蠔卷。拉麵沙律--- 係四樣餸入面最可取嘅，拉麵頗煙韌，配合蕃茄粒及西生菜，再加上不太濃杰嘅芝蔴醬，非常清新可口；蕃茄芝士豆腐扒--- 失敗之作，用陶板加熱上菜，但竟然不夠熱；茄醬係用茄糕，味道大打折扣；豆腐當然係雪藏貨，不夠軟滑；精選箱押壽司--- 呢個重大鑊，六件(三文魚、吞拿、蝦、帶子、油甘魚及一件類似牛肉嘅東西)壽司，差唔多無一件係新鮮嘅，佢嘅綽頭就係用一塊大大嘅紫菜包住件壽司嚟食，但最慘就係塊紫菜重韌過柴皮，唉.....煙肉蠔卷--- 可稱之為"油浸煙肉蠔卷"..D油重多過我身上嘅肥糕，煙肉太鹹，蓋過咗蠔嘅味。埋單重要收我330蚊，真係响屋企食出前"一丁"重好過。