古朴年代咖啡．酒館 (已結業)

新年外遊，一返黎就滾水淥腳去拜車公，順便約朋友喺附近食飯。上網睇到呢間餐廳評價唔錯就試吓佢。入到去，地方走工業風格，水泥牆同鑄鐵枱，OK有FEEL。MENU分開早午餐同晚餐，午餐選擇唔多亦唔算貴，只有飯意粉和all day breakfast，好，就會一會你個COMBO再加個意粉。個COMBO老實講真係HEA咗D，腸仔焗豆，where is the toast? 薯餅用薯蓉代替，好似唔太符合all day breakfast高熱量既標準。腸仔有三款算多，但煎得唔脆，無驚艷之處。你話唔係喎，兩個egg benedict喎－－唔提尤自可，一講把幾火，個pat醬笨唔係荷蘭醬，我懷疑係吉士醬，陣味又濃又杰完全冇風味，很失望！相對而言意粉OK好多，意粉彈牙唔腍身，菇類亦炒得岩岩好，唯一係個sauce有松露已經濃，少D忌廉冇咁heavy會好Ｄ。服務方面，order埋單都幾快，枱上面有水樽俾你自斟自飲。結論是，食物質素要再改善，用料唔差，但口味方面主廚可多聽取意見；地方好HEA好坐，吹水係幾OK既。