我愛慢煮 (孖沙街) (已結業)

好榮幸吳生帶我去食好西！今次呢餐真係十分滿意！呢個溫泉蛋大啡菇真係不得了！勁Juicy呀！一切開，啲蛋汁流晒出嚟，果下真係嘩嘩聲！仲要加埋芝士，口感真係勁豐富！而另一個小食炸蕃薯條都一樣有驚喜！上枱果陣仲熱辣辣，仲炸到外脆內軟，啱啱好！蕃薯味香甜，最估唔到竟然係配黑松露沙律醬，超正！一場嚟到，無理由唔試下慢煮菜式！主角之一嘅法式油封鴨髀，淨係賣相已經好吸引！真係估佢唔到肉質仲要咁幼嫩，就算連皮食都真係一啲都唔油！味道亦啱啱好，唔會太咸！啖啖肉，真係好爽！另一主角煙烤豬仔骨又係無得輸！完全唔韌唔鞋口，入口軟腍，肉質一樣咁幼嫩，慢煮真係唔同啲！燒烤醬又夠晒惹味，絕對係食多一份都仲得！唔好話嘢食，連嘢飲質素同樣咁高！呢杯荔枝接骨木花特飲，成粒荔枝放係上面，勁吸睛！荔枝再加上花嘅香味，好清新！而另一杯熱情芒果特飲，飲落酸酸甜甜，勁開胃！入面仲有好多芒果粒，粒粒都大大粒！包你過足口癮呀！我地食完行去搭車果陣，見到原來佢普慶坊都有一間！咁大家可以睇下邊間就腳啲啦！