等一隻貓咖啡 (已結業)

囡囡好鍾意貓，呢個暑假大大話話已經帶佢去咗三四間唔同嘅貓cafe，呢間可以話係我最滿意嘅一間。首先講價錢 ，佢頭一個鐘就68蚊之後每個鐘38蚊， 每個鐘包一個飲品， 價錢好合理。環境方面空間感好大， 入到去只有八張枱， 人貓比例合理， 而且米色嘅他他米，感覺好乾淨企理，最重要係佢冇貓騷味。全間店大概有11至14隻貓， 全部都可以摸，但就唔可以抱因為佢哋浪浪出身， 可能對人仲有戒心，而且貓仔鍾唔鍾意人哋抱。 雖然名種貓唔多， 但佢有啲細貓好活躍，瞓醒咗之後就跑來跑去咁玩， 見到覺得好療癒。 因為之前去咗旺角另外啲 貓cafe好迫， d貓連活動嘅空間都冇，要坐係食客d袋， 感覺好差。套餐食物都好味， 最鍾意食佢雞翼，點左兩客， 雞翼大大隻唔太咸，感覺健康。 漢堡包加薯條大大份。飲品方面杯綠茶鮮奶又靚又好味，打卡一流，我女嗰個棉花糖凍朱古力睇落都好靚。下次嚟想試埋佢嘅蛋糕，見食評似乎幾好食。