影片
更多
2014-11-19
899 瀏覽
煮嘢食話難唔難，話易唔易，不過，如果有人為你預備好晒食材，洗、切、量、醃乜都搞掂好晒，按部就班，新手絕對可以大顯身手呀！舊年中就試過Secret Ingredient嘅網上食材，由餐湯、沙律、主菜到甜品，由小弟一手包辦，老婆都讚有高級西餐廳水準喎。今年再接再厲，得店方贊助試煮佢哋為感恩節特別推出嘅火雞卷，另外，再自行購買多一份餐湯及沙律，同家人晌週六提早渡過感恩節，以示多謝一路嚟嘅照顧。意式羅勒蕃茄湯 $65Roasted Tomato and Basil Soup雖然每一份標為二人份量，以700毫升為標準，不過，包裝盒內顯示為1公升，絕對夠3-4個人飲，若怕個味太濃郁（因為真材實料嘛），可按個人喜好加番少少水作調校。因為個湯本身已經喺煮好，故此，唯一可做就只需翻熱，烹煮難度喺零。翻熱後，加上香脆蒜蓉包粒就完成。官網都有講明有咩材料成份，鮮橙紅色嘅蕃茄湯以蕃茄、洋蔥、大蒜、羅勒、辣椒、鹽及橄欖油又烤又煮熬成，蕃茄跟羅勒味好突出，跟罐頭湯比當然味道鮮活好多，質感亦都頗滑溜，不過，放入湯中嘅麵包粒好易變腍，所以，非必要都喺唔好「相機先食」太耐。香醋芝士紅菜頭核桃沙律 $60SI's Bee
意式羅勒蕃茄湯 $65Roasted Tomato and Basil Soup
雖然每一份標為二人份量，以700毫升為標準，不過，包裝盒內顯示為1公升，絕對夠3-4個人飲，若怕個味太濃郁（因為真材實料嘛），可按個人喜好加番少少水作調校。因為個湯本身已經喺煮好，故此，唯一可做就只需翻熱，烹煮難度喺零。
翻熱後，加上香脆蒜蓉包粒就完成。官網都有講明有咩材料成份，鮮橙紅色嘅蕃茄湯以蕃茄、洋蔥、大蒜、羅勒、辣椒、鹽及橄欖油又烤又煮熬成，蕃茄跟羅勒味好突出，跟罐頭湯比當然味道鮮活好多，質感亦都頗滑溜，不過，放入湯中嘅麵包粒好易變腍，所以，非必要都喺唔好「相機先食」太耐。
香醋芝士紅菜頭核桃沙律 $60SI's Beetroot-Walnut Salad with Feta and Balsamic Vinaigrette
同樣標為二人份，但材料填滿整個紙盒，今次個紅菜頭沙律唔似上次個希臘沙律（SI's Greek Salad）又攪又撈，完全整好晒，趁煮湯嘅時候，上碟再倒啲意大利油醋汁，撈一撈就食得，非常方便。
整盒沙律成份包括：沙律菜、紅菜頭、羊奶芝士、紅洋蔥、烤核桃及少少百里香香草，而紅菜頭及羊奶芝士份量頗多，感覺好足秤。沙律菜幾爽脆，羊奶芝士唔太羶，軟滑但挺鹹，夾埋沙律菜或紅菜頭一齊食會對大部份人嚟講易入口，此外，油醋汁酸香，令整份沙律感覺清新。
火雞卷配烤根塊蔬菜和煙肉蘑菇青豆角 $800SI's Turkey Ballotine stuffed with Thyme and Sage Sausage, Roasted Root Vegetables with sauté Bacon and mushroom with Snake Beans
嚟到今日嘅主菜「火雞卷」，真喺唔拎上手唔知條火雞卷咁墜手。10份材料由A-J標籤好晒，因為Secret Ingredient標榜人人都可以優悠咁快樂煮食，所以，除「事前功夫」搞好晒之外，一般都唔會超過10個烹煮步驟，20-30分鐘之內就可以完成，不過，今日依個烤火雞卷要烤焗，所用時較長。
主菜有張英文烹調指引，以及所需廚具提示，雖然指引喺以英文撰寫，但用詞淺易，兼且圖文並茂，總之唔使擔心，慢慢嚟，一切按部就班一步跟一步，都唔會出現大問題。
先將根塊蔬菜以橄欖油、百里香及香料撈勻，再放上火雞卷，包錫紙入爐焗35min（200°C），雖然無講用咩火，但穩陣啲用底面火就最安全。
下一步，就拎走錫紙再焗至火雞卷上色，不過，食譜就話焗多10min，但唔喺太上色，所以，開盡面火230°C焗多佢10min，效果好啲，外觀多點「古銅」色。
另外，趁第一轉焗嘢嘅時候可以煮湯上沙律，而到第二轉焗嘢嘅時候就可以炒定個伴菜，焗完、炒好就即成，有得食。
煮好嘅成品個份量真喺十足，今個火雞卷話就話4人份，個人覺得5個人都夠食，再者，仲有烤根塊蔬菜及炒煙肉蘑菇青豆角呢！
火雞卷內釀滿免治豬肉餡，雖然火雞肉一向俾人印象都喺肉質嚡啲，但勝在脂肪少，橫切開嘅火雞卷所見，真喺無乜皮下脂肪，跟個鮮打小紅莓醬，效果不俗，免治豬肉好鬆化；而配菜嘅白甘荀、紅蘿蔔、南瓜都幾好食，最得意喺兩條白甘荀，味道極似青蘿蔔，口感就似蕃薯喎；此外，煙肉蘑菇青豆亦唔錯角，煙肉嘅油香滲進新鮮蘑菇及青豆中。
晌之前個食評都有詳細介紹過Secret Ingredient（http://www.openrice.com/restaurant/commentdetail.htm?commentid=2306982&con=rvw），所以，今次都唔多累贅再講，自行上官網睇睇仲好。要講嘅喺除上環店，依家仲多咗跑馬地店，而速遞服務範圍亦已經覆蓋咗香港大概八成地區，唔知幾時晌九龍區有店呢？
題外話/補充資料：
文中已講明「火雞卷配烤根塊蔬菜和煙肉蘑菇青豆角」喺店方所送，作為試煮活動嘅材料，而「意式羅勒蕃茄湯」及「香醋芝士紅菜頭核桃沙律」喺自費購買；平均消費一欄只喺方便大家作個參考，並非完全實際消費金額，相信讀者會明白。
(以上食評乃用戶個人意見 , 並不代表OpenRice之觀點。)
張貼
