銘記潮汕牛肉粉麵

營業中

休息中

呢一日，原本打算沿彌敦道南行，經加士居道去土瓜灣醫肚，點知行到窩打老道口，遇紅燈，而對面彌敦道就綠燈，於是把心一橫，過對面馬路，再行前一個街口轉右，再次嚟到呢間特色店舖食嘢。今次係第二次嚟，當然係食一啲食都未食過，甚至聽都未聽過嘅嘢啦！左揀右揀，左計右計下，叫咗碗三併麵：吊龍伴、牛栢葉及牛黃喉，上次試咗公仔麵，今次就試粉麵店比較少有淮山麵，連熱檸水，承惠$56。今次上檯速度算快，約5分鐘就到，唔使好似上次咁，等到頸都長，差啲忍唔住連包魚皮食埋都未到。先咬一口吊龍伴，嘩！鮮味都不得了，即使事隔多日，依然回味無窮，上網查資料得知佢係吊龍嘅下邊，即係肉眼邊，油香及肉香比例都好高，真係好好食，可惜係太碎，唔係一片片牛肉，否則就更好食。牛栢葉係用唔常見嘅黑葉，又睇翻網上資料，原來黑栢葉係鮮貨，而白栢葉係經雙氧水漂過。呢個黑栢葉比白栢葉好食，除咗都係爽脆外，唔韌，證明唔會過熟之外，口感都比白栢葉豐富，但點豐富我又唔識形容，總之就好食。牛黃喉係繼上次之後第二次食，仲記得上次感覺麻麻，淡而無味，得個爽字。但今次好唔同，爽得嚟又有啲味，會唔會同個配搭有關？抑或同師傅嘅火喉有關？至於淮山麵都好滑，好好食。