茶木‧台式休閒餐廳 (已結業)

話說今晚同爸媽、BB去中環茶木食晚飯，店員收餐具時唔小心倒瀉咗成碗蕃茄湯落我身度，好彩只係整到BB少少，我掛住先抹好張梳化凳，怕BB整到烏糟晒，我先再企喺身處理自己條裙，白色底印花裙染晒蕃茄色。女店員過來慰問我，仲拎件公司制服俾我，因為我件衫只係沾到少少蕃茄湯，所以我話唔駛啦。幾個職員慰問咗我，我都笑笑口答唔緊要，因為我覺得人人喺工作上都會有犯錯既時候，食完飯喺lift口竟然撞到女店員，原來佢落左去Topshop買咗條牛仔裙俾我換，我話唔駛啦，但佢話因為佢地整烏糟咗我條裙，而且又已經買咗，叫我快d換咗去。我換好之後，亞爸話佢去櫃面埋單時，店員叫我地等一陣，話佢地女店員落咗去買裙俾我，最後仲免費埋我地個甜品。真心想讚下茶木所有員工，多謝佢地為咗我條裙安排咗咁多野，仲有希望果個同事仔唔會俾人鬧啦，其實我無嬲、無鬧、亦無嘈，因為我都有個小朋友，我希望佢大個時，工作上犯錯都一樣會有人原諒同包容。希望呢個同事仔都唔好再內咎，亦多謝中環茶木上下員工既熱心幫助。