等你 _ _ (已結業)

啱啱行過見開咗間新店，最近又想食台灣嘢，所以好興奮咁入咗去試。入到去裝修都唔差，座位都算闊落。一入去聽到廚房話雞排賣哂，所以就叫咗兩個豆腐滷肉飯，一個水餃麵。點知幾分鐘後有個全程黑面嘅女人（唔知係侍應定老闆）走埋嚟飛張點餐紙再丟支筆落枱，拋低一句“我哋冇水餃喎”，跟住就即刻飄走咗。我哋成張枱都呆咗，佢講到好似我哋強人所難要食水餃，但係明明係餐牌上面有㗎喎。賣哂你係唔係可以交代清楚啲呀。我都吾係想你道歉，但係佢嘅態度真係好古怪，好冇禮貌。隔咗陣有個男人走埋嚟問係唔係有嗌奶茶，我哋答佢係，佢放低咗唔夠幾秒又走過嚟攞番走，都唔知佢做乜。感覺成間鋪頭好混亂，服務態度亦都唔好。譬如珍珠奶茶未飲佢就收走支飲筒等等。雖然碗飯係幾好食，但係個黑面女人真係好恐怖。另外，食台灣嘢梗係要試珍珠奶茶，但係佢杯茶得淡奶味，茶味要聞先聞到，飲落真係無乜。