其味煮意 (已結業)

平日甚少入屯門，今日專登入嚟揾朋友順便食飯，就黎左呢間工廈裡面既餐廳，剛好過了中午繁忙時間，所以無咩人可以慢慢坐。呢度地方夠哂大，又有少少裝修咁，除了一般既午餐外，原來都有商務套餐，價錢唔貴一於試吓。先來餐湯，upgrade 左做龍蝦湯，味道鮮甜仲有好多蝦仁，不錯！主菜選咗「香煎三文魚柳」（$138），條三文魚又厚又大，相當驚喜！加埋香草，外皮煎得好香口，另外仲有少少菜和一片大蕃茄墊底伴碟，仲可以配意粉。另外點了「美國安格斯西冷牛扒（5安士）」（$108 ），一個人5安士其實都好夠食，牛柳好腍，質素幾好，加埋薯菜都好豐富。我哋都加咗兩個甜品，焗火焰雪山及士多啤梨芝士蛋糕，以為火焰雪山會有火，其實沒有的，哈哈！賣相唔錯，打起既蛋白夠滑，甜度適中。士多啤梨芝士蛋糕都好有士多啤梨味道，酸中帶甜。呢度嘅飲品亦都值得一試，本身套餐可以加錢upgrade做Starbucks咖啡，俾埋個Capsule你睇，冇花冇假。我就揀咗要洛神花梳打特飲，大大杯，少少甜，唔錯。