紫玉蘭 (已結業)

呢餐係一餐應酬飯,所以係預先點好左一席菜,菜式十分豐富,十二人份量,我地十二個人,最後都食剩好多。菜式味道同賣相都唔差,有d仲幾好,但係上菜速度真係慢,尤其係一開始既時候,我地等左好耐至有得開餐,仲要催幾次,人人都有食住小碟前菜先(雖然前菜既豆腐,青瓜等又真係幾好味…)。片皮鴨做得唔錯,因為好多地方都做得過肥,估唔到呢度食到少肥既片皮鴨,同埋個醬又係好味,唔漏,食多兩件都覺得ok!有一味唔知什麼蝦球,都係好味道,係有才才辣,但係整得夠入味,蝦夠爽口,幾好!蒸左兩條魚,呢道先係我至愛,魚肉夠滑,豉油竟然都好味,多肉,好耐無試過食魚食到啖啖肉又唔腥既感覺,很好!反而小籠包我就覺得好一般,無特別。醉雞,海蜇,素鵝,唔知咩肉(好似喱一片片四方形咁既)果的幾小碟又係普普通通,唔係特別好味,只係可以囉。有個翅,呢個都唔錯,起碼唔會過膩,同埋夠多料,又帶子又竹笙,啖啖入口都有料,真係無欺場!鮑魚海蔘就個汁太濃,少少油,唔太好。最唔喜歡最後既炒烏冬,勁多油!又難食!又無送!唔好!炒飯好過!可惜無機會食至愛既賽磅蟹同埋高力豆沙…有機會要試試至得!