潮城魚蛋粉 (已結業)

今日又去灣仔做Gym，肚餓搞野食，行嚟行去唔知食乜好，見倒眼前鋪 頭有粥品早餐，醒起好耐冇食過粥，咁就是是但但走入去坐低左。叫左個豬紅艇仔粥+炸兩 (HK$30)豬紅艇仔粥叫左唔夠5分鐘，野食到齊，食艇仔粥我會先攪一攪起碗底嘅牛肉碎，等一等佢熟，然後先食，粥料只有豬紅、魷魚、生菜、花生及碎牛，喂少料左啲喎！艇仔粥基本材料應有碎牛、瘦肉糸、水魷魚、豬皮、菜糸、炸魚片糸、鯇魚片及花生等等，每間唔同嘅粥鋪都會選擇其中五至六種材料放入粥裏頭，但呢個粥就只有其中四款材料，實在太少料！而粥底好淡，亦都冇米香。炸兩從賣相一睇已經知道係一早做定，食一啖，豉油較得Ok 嘅，油炸鬼預左凍、靭同唔脆，果然全中，腸粉做得一啲都唔挺身！總結: HK$30 蚊一個早餐，其實真係唔應該有要求，但食肆係咪就可以做得咁冇誠意呢？其實碗粥用料加多啲啲炸魚片及豬皮糸，粥底用多少少雞粉調味，可能成碗粥已經唔同哂，要做到呢個效果唔使HK$1蚊成本！而腸粉只要加多少少馬蹄粉或者粟粉就可以挺身啦！付出多少少去改善早餐嘅味道都唔願，就係大部份香港提供平價早餐鋪頭嘅特性，唔怪得去完台灣嘅朋友都同我講佢地嘅早餐做得有誠意過香港好多。