日和号壽司料理 (已結業)

一行2人食lunch 唔知食咩，諗住日本野差極有限。門口侍應一輪咀介紹，見無人是但喇，坐低QR落單，無俾menu睇，無所謂諗住lunch 簡簡單單，叫左一個豚肉拉麵，d豚肉厚切到成塊五花腩咁，湯少到好似撈麵，又唔夠熱。另一個叫左壽喜燒，個餐跟刺身同一碗飯。個三塊刺身無評語，起碼唔係即刻去厠所，個碗飯濕嘅，似少左水嘅糊仔，多左水嘅飯，到主菜壽喜燒，熱嘅，有基本嘅味道，唔係點住火咁上，d肉比較難咬。2個餐跟2杯飲品，汽水杯上，熱柚子唔洗加錢。侍應好勤力換豉油，個客食緊野都要幫佢換，另外幾個講野好大聲，連佢要去開大開小都知，不停係餐廳來回咁行，就好似人肉迴轉壽司。雖然手戴手套，但又摸頭又打乞嗤又打電話，衛生情況有待改善。埋單自己去收銀，一見到張單有加一，忍唔住講左句，咁都要加一？無服務都要收服務費，除咗上菜，全程自助，水又無，牙籤又無，何來服務？飲食業如果繼續係咁，將來都幾坎坷！