浪人日本料理 (已結業)

表弟愛於街外用膳，經常出入中、上、西環區，故家庭聚會中，大家都總會講飲講食 。早一個週末飲茶時，唔多識睇中文o既佢就推介中環一家叫「Ronin」o既日本餐廳，眼見OpenRice上三間「Ronin」中只有一間喺中環，所以就大擔斷定佢所指o既就係新開o既「浪人日本料理」，週四立即約會honey去食魚生。（後尾先知表弟個人地圖中，上環等同中環 ，亦即小肥會錯意！）剛於月初正式啓業o既「浪人」位於中環蘭桂坊口一幢大廈六樓，交通好方便，不過樓上樓下都有日本餐廳，似乎浪人極愛挑戰喎 。店子升降機門前一角有個鮮花噴水池陣 ，唔知係咪睇過風水呢？！接待處旁有個高櫈候座處。餐店並無花巧o既裝潢，除咗架上可見有清酒玻璃瓶及零星小擺設之外，中央就只有一個鮮黃色o既四方形大壽司吧。散座全為合拼式o既四方木枱櫈，隔得都幾開吓，簡潔鮮明，感覺都幾開揚闊落舒適。當開始人多o既時候，細心有禮o既哥哥仔自動拉下食客身後o既布簾 ，增加私人度o既同時，亦成功減低室內雜聲，有意思。據悉，食店開業未到兩星期，晚市餐牌其實仍在製作中，除咗未翻譯成英文之外，刺身壽司類都未有印落臨時餐牌上，不過經理姐姐話必定會盡量滿足