阿里山 (逸酒店) (已結業)

去過台灣嘅朋友們，唔知係咪同我一樣，都有去過排隊買古早味蛋糕呢？超懷念個啲味道呀。我嘗試過跟網上食譜學整蛋糕，但唔係個頂燶咗，就係入面唔夠熟，而且質感永遠都係「差咁啲」，做唔到台灣嘅效果😢。紅磡呢間「阿里山台灣古早味蛋糕」💛，每日新鮮出爐，唔少街坊夠鐘就喺店鋪前面等蛋糕出爐😍。佢哋推出多款新口味，保持新鮮度，令一眾顧客忍唔住不停光顧呢。我叫咗3種口味返屋企嘆：原味古早味一食就令我諗起台灣買嘅古早味蛋糕，一樣咁軟綿、咁蓬鬆、咁濕潤同咁有空氣感，仲有陣陣嘅蛋香味🥚，就算係晚餐後先拎出嚟都仲好新鮮，兩位公子係咁追住食，正呀喂😍！柚子蜂蜜味呢個我老公大讚👍🏻，佢用日本進口嘅柚子，配上台灣嘅龍眼蜜🍯，聽落都流口水呀。甜酸度剛剛好，好惹味，仲食到柚子絲，感覺好健康呢！芝麻味頂層鋪滿黑芝麻，香味濃郁，比較淡味少少，但就啱晒我，再加上頂層用芝麻醬拉花，好靚呀，我覺得好似食緊件藝術品咁😂。搵日再去買其他味試吓先，下次我會沖定壺靚茶去嘆呢啲藝術品🍵。