安娜餐廳

營業中

休息中

元朗安娜，我第一次係中三嘅時候，至今已經十多年，真心陪著你走嘅感覺。中間佢曾經俾食環勒令停業一兩個星期，果時好驚佢就咁執左，因為想据扒我都一定嚟呢度。由佢有經典格仔枱布俾你遮住唔好俾汁彈到到宜家只係俾張紙巾你擋一擋，由職員姐姐因爲以前忙到抽筋而會惡死蘭登趕你走到宜家對人有小小笑容，幸而味道係冇變，依然令人懷念。首先佢個包包，係會烘到餅乾咁脆，不過我比較懷念以前佢仲有餐包揀嘅時候，因為我鍾意食熱辣辣軟綿綿嘅餐包多啲。我自己超鍾意飲佢個紅湯，好足料又有小小辣辣地，係出面第間搵唔到嘅味道。至於白湯相比之下冇乜特別，但絕對唔係罐頭湯。今晚同男朋友都嗌左牛柳，雖然塊扒冇以前咁厚，但係依然腍但又唔會有鬆肉粉味，依然值得讚。而汁我覺得同牛扒最夾嘅始終都係黑淑汁，但原來洋蔥汁甜甜地都幾好食。希望呢間街坊懷舊扒房可以繼續保持呢個味道。