喜喜冰室

營業中

休息中

如果唔係朋友帶我去，我都唔知銅鑼灣有間咁懷舊裝修嘅茶餐廳，牆上擺咗好多舊卡式帶，以及掛咗多張舊嘅學校畢業相。餐牌都有好多張，而且每張嘅設計都好特別，無論圖案及字體都睇得出好有創意，仲有擺放牙簽及方糖嘅不銹鋼容器，都好懷舊感。最特別係電視機播嘅都係好舊嘅電視或MTV片段。睇完餐牌後，就叫咗兩個蛋撻、鴛鴦太極炒飯、熱檸水、熱檸茶及凍檸茶。蛋撻$9個，細細個好味道，一個人都可以食到兩個。鴛鴦太極炒飯$96，份量都唔細，賣相及味道都唔錯。總結：無論早餐、湯粉、小菜、鐵板餐、中西式粉麵飯都有，出前一丁仲係用日本版，難怪餐室內外都有咁多食客。