港原味 (已搬遷) 新店位置

難得有二人世界時間，出去搵個地方食飯傾偈，嚟到呢間「港原味」，裝修充滿懷舊香港味道。雖然係下午茶時間，不過都仲有好多唔同食物可以選擇。見到佢個咖喱農夫包（$99），好似好吸引，一於叫一個嚟試吓，新鮮焗出嚟熱烘烘嘅麵包，外皮夠脆，裏面裝滿咖喱，好彩可以揀豬牛雞，我哋揀咗牛肉，都整得幾唔錯，一啲都唔對un。同時附上沙律菜伴碟，幾好。唔食咖喱嘅朋友，仲可以轉芝士黑松露醬，不過我覺得咖喱又唔辣而且好惹味，都值得推薦。下午茶選擇都有N款(真係A至N架😆)，好多都好想食，最後揀咗炸雞脾配薯條（$39），雞脾炸得脆但唔會好乾，保持到肉汁，所以幾好食，薯條數量稍微少咗d。由於我哋兩個都未食午餐，所以決定加多個「撈得起常餐 」（$49）， 選了芝士黑松露醬豬扒撈意粉，d汁比較稀，同想像中嘅撈麵有點不同，不過豬扒都係好食嘅。三個餐都可配飲品，加$10可轉特飲，我哋就轉左雪山紅豆冰，雖然只係忌廉不是雪糕，但係都好好味，透心涼啊！第三杯要咗熱奶茶，質素都唔錯呀！