科記咖啡餐室

營業中

休息中

一直聽講科記出名豬排靓，今日終於有機會來試一試呢間老字號茶餐廳。禮拜六早上11點左右來到嘅時候未見人龍，好好彩即刻就有位。我好鍾意餐廳門口兩塊拉廉，除左阻擋太陽之外亦顯得旗幟鮮明，大大隻字寫上餐廳嘅名物豬牌飯同牛肉麵，相當有代表性。因為未到午飯時間，所以我無點到網絡上推薦嘅金牌豬排飯，而係揀咗豬排麵。雖然係即食麵底，湯底都無咩特別，但係啲豬排嘅肉質紮實，又唔會乾柴，而且又夠肉味，的確比其他茶餐廳嘅豬排做得出色。下次再來會試下佢地嘅豬排飯睇睇會唔會更加好味。呢度雖然係間簡樸嘅茶餐廳，但員工嘅服務都好貼心。當時我係同其他兩位食客搭台嘅，服務員伯伯見我將個背囊放喺大髀度，就主動搬張凳過來俾我放個袋，十分細心。