十六座車仔麵 (已結業)

Late Dinner夜媽媽未諗到去邊度食，行過見到呢一間懷舊feel既車仔麵檔， 睇餐牌價錢唔算貴， 睇落有啲人氣,裝修都唔差,就拱左入去食啦。揀嗰麵底先， 紅菜頭麵、芙蓉麵即係咩麵？! 睇你老闆有落個心思喎 。我就叫咗個芙蓉面黎試下啦 ，再加豬大腸、咖哩魷魚、 蘿蔔加鹵水汁。個麵嚟到大小適中,檯面有辣椒醬， 打開睇原來係沙嗲醬嚟㗎,又幾特別喎,落幾滴好滋味, 我唔算食得辣，食食下都覺得幾辣呀！大埔米芝蓮嗌咗韭菜餃、蝴蝶腩同鹵水豆腐撈粗麵 ,上菜嘅時候佢個碗真係好大㗎。 韮菜餃雖然係自家製但係就細粒咗啲囉 ，蝴蝶腩都唔錯，果然係招牌推介， 再加碟腐乳通菜 ，雖然碗細細但擠得好滿。見到隔離枱嗌左杞子六花茶，睇落都幾吸引， 我下次都要試下先，去到最重要嘅一個環節就係埋單呀喇，埋單嗰度有一大盤白兔糖 ，我同米芝蓮都好貪心咁攞咗幾粒我地事前雖然冇講，但其實一齊俾盤白兔糖吸引左入去。