新記冰室 (已結業)

原本諗緊食咩好，點知行行下見到呢間冰室，吸引咗眼球，然後就一言不發咁拉咗個朋友入去試。個裝修的確幾懷舊，吸引到唔少人嘅目光，而家都幾多人去食。疫情關係，餐廳啲隔板都幾高下，完全睇唔到隔離檯，好似自成一角咁，私隱度極高。好耐無見過呢款風格嘅裝修，好似坐咗時光機最正嘅係，下午茶竟然去到7點鐘，30幾蚊40蚊就食到個主食，好抵。即使係正價餐牌，1個主食都只係$50，唔貴。小食都幾多選擇，重點係紅豆冰系列，紅豆冰都有三款口味🤣好貼心今次先叫咗個懷舊紅豆冰試吓，奶同紅豆份量參半，啲奶好滑，紅豆起沙，搞埋一齊味道濃郁😍值得推介嘅係黑松露滑蛋多士，炒蛋份量好大，覆蓋晒成塊多士，而且真係好滑嘅滑蛋，配上黑松露，每啖多士都好滿足。叉燒炒意粉方面，叉燒好香口，配上黑椒炒意粉，味道好夾。芝士汁豬頸肉煎蛋撈公仔麵，呢個大家一定要試吓，個芝士汁撈公仔麵真係冇得彈。