中環茶記 (已結業)

老公好得意，佢鍾意食茶餐廳多過高級西餐，可能因為夠貼地，食得舒服自在。但成日食茶餐廳，我會覺得悶，所以我成日發掘各區嘅特色茶記。中環茶記畀我感覺就係高檔有特色嘅茶餐廳，環境冇一般茶餐廳咁迫夾，裝修有心思，有懷舊氣氛。食物方面，餐廳選擇豐富，而且水準高，大家都食得好滿意。老公就食鐵板餐牛柳拼大蝦，女女就有激邪惡嘅鹹蛋流心西多士，同埋柚子可樂雞翼。我就鍾意食清清地，叫左上湯浸菜同碧綠爐魚，即係鱸魚片炒西蘭花。我最鍾意食魚，鱸魚片爽滑，食得出好新鮮。食飽飽先見到原來餐廳有牛油果流心多士，我係牛油果控，下次一定要再來試！