加記 (真善美大廈) (已結業)

是日要去香港大學辦點事，點知原來要攪成日， 完事後筋疲力盡， 於是同事就話不如去食個quick dinner補充體力， 都好喎，咁就去左附近呢間加記喇。加記其實都係街坊小廚，唔係咩高檔野，食物亦都唔係超級好食，但勝在有親切感。店家推介杏汁炖白肺，真係好好飲， 連我向來唔飲老火湯嘅都成碗飲哂😜。我地只有四個人， 所以都唔敢叫太多，點了個香口嘅脆皮炸子雞，皮脆肉嫩，唔算太油膩。舖面啲蝦片都好新鮮香脆。原本點完個湯同雞之後就唔知再點咩好， 正在煩惱中時， 我偷聽到店員之間對話提到有好靚嘅凍烏頭，我一聽就知好野， 因為佢菜單上係冇嘅， 只有熟客先識點， 我即刻推介同事點一條， 原來佢地都未食過凍魚喎，我就拍心口話佢地知保証試過一定質👍。果然大家都一致好評，凍食更突出魚嘅鮮味，如果有普寧豆醬更好， 但畢竟佢唔係正宗潮州酒家，所以唔好要求太高。最後我地再點了一個魚湯浸十二蔬，收尾點都要個清菜菜式嘅，時蔬索左魚湯更好味。呢餐飯雖然簡單， 但食落溫馨，食得多山珍海錯，有時食返餐平民小炒都幾好吖。