麪譜車仔麵 (已結業)

今日肥妹仔去完太和探親戚，之後同肥媽去咗呢一間叫麵譜車仔麵度食午餐！入到去人流都好多，等咗一陣先入到去。一入到去肥妹仔就俾佢嘅裝修吸引咗！佢嘅地板係一啲好懷舊冰室嘅地磚仔，然後牆上邊有一個好吸睛嘅以前大笪地燈棚嘅圖案，有feel!!肥妹仔就叫咗嗲牛柏葉，豬紅，炸魚皮，紫菜，溏心蛋，麵底就轉左讚歧烏冬，清湯湯底。咖喱牛柏葉煮得好軟熟，咖哩味濃。豬紅肥媽試咗一舊，佢都覺得係一啲好爽口嘅豬紅，一啲都唔！炸魚皮炸到非常香脆，唔錯！肥媽就叫咗米線底嘅車仔麵，揀咗清純蘿蔔妹，多汁多水冬菇，陳皮魚蛋，魚片頭，麻甩辣魷魚！肥媽食完嘅comment都係覺得佢嘅配料真係做得唔錯，冬菇好新鮮，蘿蔔好清甜，一啲渣都冇！魷魚爽口得來亦都好入味，陳皮魚蛋係肥媽至愛，魚片頭好爽口。另外肥妹仔仲叫咗炸魚肉雲吞同埋甜酸齋做小食，雲吞好特別，外皮炸到脆卜卜，魚肉煙煙韌韌，好好食，肥妹仔好鍾意。由於天氣實在太熱嘅關係，肥妹仔同肥媽嗌咗一杯凍奶茶少甜。簡簡單單食車仔麵做午餐其實都好滿足！