火五越式牛肉粉專門店 (清風街) (已結業)

剛剛食完行出門口上咗車 ，急不及待即刻寫食評，今次係我第一次寫食評，因為從來冇嘢令我有衝動去寫，今次真係有了。。首先行入餐廳，全間餐廳得我一台，無人問你幾多位冇人service ，見到一位染金頭髮戴眼鏡嘅小姐坐咗喺收銀機玩電話。我喺點單止寫好要啲乜嘢就交畀佢， 嘢食唔使十分鐘全部到齊 。生牛河微暖唔熱嘅 ，配菜有一碗芽菜 ，又黑又黃， 好似擺咗大半日冇放雪櫃亦都冇用水預先浸住。牛筋牛腩撈檬，我明白檬粉應該唔係熱嘅，但係牛筋牛腩都係凍嘅。豬頸肉木瓜沙律，好明顯啲豬頸肉係整左好耐之後，用微波爐叮出嚟，乾柴烈火 。就連炸春捲都係微暖嘅 。野食既味道更加全部都唔需要講 ，唯一一款真係感覺到係剛剛做起嘅，就係黃金蝦球，食落真係脆同埋熱嘅 ，進食途中金髮眼鏡小姐不停咁樣大聲講：「落錯單呀仆x呀，落錯單呀仆x呀 」大佬有客人喺度，或者尊重人哋尊重返自己囉 ，呢間係我人生食過最難食，最差服務嘅越南餐廳。可能係我唔啱啦，五點幾六點走去食嘢，人哋可能都未想做我生意。