蓬瀛仙館齋廚

營業中

休息中

年尾去蓬瀛仙館還太歲，黎到覺得肚餓（因為未食lunch,，就係因為想黎食齋，所以留肚），就入黎食野醫肚。下午3-4點冇乜人，不過4：30 last order，食到5點就要走，各位想黎食齋菜記得預岩時間。同埋佢地係唔希望各位帶各類葷入黎，各位最好唔好帶啲乜肉乾肉粒呀，乜魚絲魚乾之類既野入坐啦。黎到睇睇餐牌，就點左2味菜，一款齋乳豬，另一款西檸汁煎蘇卷，再每人十蚊茶位加任食白粥或飯。埋單百五蚊攪掂，要去去櫃枱比錢先。簡單講，黎到主要係食粥，啲菜未黎之前，我就倒左三碗粥落口，冇錯，真係倒落口，加小小鹽，筷子撈勻，唔洗用匙羹，就咁倒。佢地米既比例唔多，算係稀粥，又綿又好味又易入口。倒完一碗倒兩碗，倒完兩碗倒多碗，如果唔係叫左野食，我諗我倒粥都夠飽前後連食餸我起碼食左七八碗粥。另外兩味齋菜就正正常常，份量味道等都係合格以上。乳豬記得點坐低時佢地比茶時附加既醬，咁就最好食。西檸卷小小酸甜酸甜，唔錯。不過最緊要係一啖菜加幾啖粥，食完啲粥記得出去畢返碗粥埋位先再食菜，包你食到飽。