富華燒臘飯店

營業中

休息中

係紅磡返左工咁多年，之前都只係黎過一次食早餐咁大把，仲係食沙嗲牛麵太陽蛋，無咩特別，大路安全，無問題。依家先正正式式去試佢地既出品，見日日都排長龍，應該唔會太差掛 ~菠蘿沙嗲牛肉炒河，賣相真係麻麻，但味道還可以，唔記得叫佢要兜混添，仲有個問題係無鑊氣，唔夠熱囉。河粉就幾好，非常完整，唔會碎濕濕，都係同樣問題，唔熱囉，只係暖暖地。味道偏甜，鮮牛口感算嫰滑，無煮過時。整體黎講可以啦，係平實無咩驚喜啫。炒飯底，油就油左啲，不過好有鑊氣，熱騰騰，有功架有技巧，炒到啲飯一粒粒分開，絕唔會一舊舊或濕答答，每粒飯都有蛋包住，炒得非常香口，勁 ﹗咖喱牛腩，一睇都知層經雪過，肉色程深啡色及已無咩水份乾乾地，雖知炆肉要放過夜先入味，先會更軟腍，但心理上點都有啲怪怪地，因我好怕食煮完雪過再翻煮既食物。食落都炆得入味，口感算腍，係乾啲囉。咖喱味香濃，港式中上級，幾好。